မင်္ဂလာပါဗျာ...။
တစ်ချို့လူတွေက မိမိတို့နေ့စဉ်တွေ့ကြုံနေရတာကိုပဲ ဖြစ်ဖြစ်၊ လုပ်ဆောင်ခဲ့ရတာတွေကိုပဲ နေ့စဉ်မှတ်တမ်း(ဒိုင်ယာရီ) ရေးတတ်ကြပါတယ်။ ကျွန်တော်ကတော့ အဲဒါမျိုးတွေ သိပ်မလုပ်တတ်ပါဘူး။ ဒါပေမယ့် တစ်ခါတစ်လေတော့ စိတ်ထဲမှာ တွေးမိတတ်တာလေးတွေကို စာနဲ့ရေးမှတ်ထားတတ်ပါတယ်။ အခုလည်း ကျွန်တော်စိတ်ထဲမှာ ပေါ်လာတဲ့ အတွေးစတစ်ချို့ကို မျှဝေလိုက်ပါတယ်။ ကဗျာလည်းမဟုတ်၊ ဇာတ်လမ်းတိုလို့လည်း ခေါ်လို့မရတဲ့ ဟိုမရောက် ဒီမရောက်စာတွေမို့ မှတ်စုလို့ပဲ ခေါင်းစဉ်တတ်လိုက် ပါရစေ။ ခံစားကြည့်ကြအောင်ဗျာ...။

ရန်ကုန်မိုး (၂)

အထီးကျန်လှတဲ့ တစ်ချို့သော ရန်ကုန်မိုးညတွေမှာ မိုးတွေက မည်းမည်း၊ လယ်ကွင်းတွေက စိမ်းစိမ်း၊ အိမ်လေးတွေက ညိုညိုနဲ့ ကျွန်တော်နေခဲ့ဖူးတဲ့ မြို့လေးဆီ အိပ်မက်တွေကနေ တစ်ဆင့်ပြန်ရောက်သွားခဲ့မိတယ်။ မိုးသည်းသည်းတွေအောက်က သူတို့ရဲ့ ဘ၀ကြမ်းကြမ်းတွေကို စာနာနားလည်နိုင်ပေမယ့် လက်တွေ့ဘ၀မှာတော့ ကျွန်တော်.....ရန်ကုန်မိုးထဲ တစ်ဝဲ၀ဲလည်..။ 
မျိုးဇော် (၁၃.၀၇.၀၉)

နေ့တစ်နေ့ကို ဖန်ဆင်းခြင်း


အလင်းရောင်ကိုပေးတဲ့ နေ့တစ်နေ့နဲ့ အမှောင်ထုတို့ ကြီးစိုးတဲ့ ညတစ်ညတို့ ပေါင်းစပ်မိတဲ့ အခါ ရက်တစ်ရက်ဆိုတာ ဖြစ်ပေါ်လာရတယ်။ ရက်ဆိုတာကတော့ လူသားတွေကို အသက်ရှင်သန်မှုပေးပြီး ပျော်ရွှင်စရာတွေ၊ ၀မ်းနည်းစရာတွေကို သယ်ဆောင်လာပေးတဲ့ သဘာဝတရားရဲ့ လက်ဆောင်တစ်ခုပါ။ ကျွန်တော်ပြောချင်တာ လောကကြီးမှာ ဆန့်ကျင်ဘက်အရာနှစ်ခုပေါင်းစပ်လို့ မရဘူးလို့ ဆိုနေတဲ့လူတွေကို ကျွန်တော်တို့ဖြတ်သန်းနေကြတဲ့ နေ့ရက်တွေကိုက ဆန့်ကျင်ဘက်အရာ နှစ်ခုပေါင်းစပ်ထားတာပဲလို့ ရှင်းပြချင်တာပါ။
မျိုးဇော်(၂၈.၀၆.၀၉)

အိုင်စတိုင်းသိမသွားခဲ့တဲ့ နှိုင်းရတစ်ပုဒ်


အတန်းတစ်ခုမှာ ဆရာက ကျောင်းသားတွေကို ကျောက်သင်ပုန်းပေါ်မှာ အရွယ်အစားရော ပုံစံပါတူတဲ့ မျဉ်းဖြောင့်နှစ်ကြောင်းကို ဆွဲပြတယ်။ ပြီးတော့ အဲဒီ့မျဉ်းဖြောင့်နှစ်ကြောင်းကို ထပ်ပြီးတော့ ဆက်လည်းမဆွဲ၊ ဒါမှမဟုတ် မူလရှိပြီးသား အရှည်ကို ဖျက်လည်းမပစ်ပဲ၊ ပိုပြီးတော့ တိုလာအောင်၊ ဒါမှမဟုတ် ရှည်လာအောင် ဘယ်သူလုပ်နိုင်လဲလို့ မေးတယ်။ ပထမတော့ အတန်းတစ်ခုလုံး ငြိမ်သွားတယ်။
နောက်တော့ ကောင်လေးတစ်ယောက်က သူလုပ်နိုင်ပါတယ်ဆိုပြီး အတန်းရှေ့ကို ထွက်လာခဲ့တယ်။ ပြီးတော့ ပထမမျဉ်းတစ်ကြောင်းရဲ့ နဘေးမှာ သူ့ထက်ပိုတိုတဲ့ မျဉ်းတစ်ကြောင်းကို ဆွဲလိုက်တယ်။ အဲဒီတော့ ပထမရှိပြီးသား မျဉ်းဟာ ပိုပြီးရှည်သွားတယ်ပေါ့။ နောက်ပြီး ဒုတိယမျဉ်းဖြောင့်ရဲ့ ဘေးမှာတော့ သူထက်ပိုပြီးတော့ ရှည်တဲ့မျဉ်ဖြောင့် တစ်ကြောင်းကို ဆွဲလိုက်တယ်။ အဓိပ္ပာယ်က ရှိပြီးသား မျဉ်းဖြောင့်တစ်ကြောင်းက ပိုတိုသွားတယ်လို့ မြင်ရတယ်လေ။
ဟောဒီဇာတ်လမ်းလေးက ရူပဗေဒပညာရှင်ကြီး အိုင်စတိုင်းရဲ့ relativity theory လို့ခေါ်တဲ့ ကမ္ဘာကျော် နှိုင်းရသီအိုရီကို ဥပမာပြပေးခဲ့တဲ့ ပုံပြင်တစ်ပုဒ်ပါ။
အဲဒီ့ နှိုင်းရသီအိုရီရဲ့ တန်ဖိုးအကြောင်းကို ယုံကြည်လက်ခံတဲ့ ကောင်လေးတစ်ယောက်က သူချစ်တဲ့ကောင်မလေးရဲ့ အသည်းနှလုံး တစ်ခုပေါ်မှာ ရှိနေပြီးသား မျဉ်းကြောင်းတစ်ခုဘေးမှာ သူရဲ့အချစ်တွေကို မျဉ်းဖြောင့်တစ်ကြောင်း အဖြစ်အသက်သွင်းခဲ့ပါတယ်။  သူ့အမြင်မှာတော့ သူဆွဲခဲ့တဲ့ မျဉ်းဟာ ကောင်မလေးရဲ့ နှလုံးသားမှာ အရှည်ဆုံးပေါ့။ ဒါပေမယ့် တကယ့်တကယ်ပြန်ကြည့်လိုက်တော့ သူဆွဲခဲ့တဲ့ မျဉ်းတစ်ကြောင်းက ကောင်မလေးအတွက် အတိုဆုံးဖြစ်နေခဲ့တယ်။
ဒါဆိုရင် နှလုံးသားတစ်ခုထဲက မျဉ်းဖြောင့်တစ်ကြောင်းမှာရော အိုင်းစတိုင်းရဲ့ relativity theory က အကျိုးသက်ရောက်မှု မရှိတော့ဘူးလား။ ဟောဒီ့ အဖြစ်အပျက်ဟာ universal true နီးပါး မှန်ကန်ပါတယ်လို့ အားလုံးက ယုံကြည်လက်ခံထားတဲ့ relativity theory ရဲ့ပျော့ကွက်လား၊ ဒါမှမဟုတ် အဲဒီကောင်လေးဆီက အချစ်တွေရဲ့ ပျော့ကွက်လာဆိုတာတော့ မသိနိုင်တော့ပါဘူး။ ဘာလို့လဲဆိုတော့ အိုင်စတိုင်းကြီး ကွယ်လွန်သွားခဲ့တာ ရာစုနှစ် တစ်ခုတောင် စွန်းခဲ့ပြီ။ ကောင်မလေးလည်း ကောင်လေးရဲ့ နဘေးကနေ ထွက်သွားခဲ့တာ ရက်တွေအတော်ကြာနေခဲ့ပြီလေ...။
မျိုးဇော်(၂၇.၀၆.၀၉)


လွင့်ကြွေသွားသော နှလုံးသားတစ်ခု


ဟိုးတစ်နေ့က မိုးတွေ သည်းသည်းမည်းမည်းရွာတယ်။ ငါ့ရင်ထဲမှာ ထိန့်ထိန့်လန့်လန့်ကို သတိရမိတယ်။ တစ်နေ့က မိုးတွေဖွဲဖွဲလေးပဲ ရွာတော့ ဆွေးမိသလိုလို ခံစားမိပြန်ရော။ ဟော မနေ့က မိုးတွေမရွာဘူး။ ဒီလိုဆိုတော့လည်း ရင်ထဲမှာ တစ်ခုခုပျောက်ဆုံးသွား သလိုခံစားမိပြန်တယ်။ ဒီနေ့ရော ရာသီဥတုအခြေအနေက ဘယ်လိုရှိလဲလို့ သိချင်ဇောနဲ့ ပြတင်းတံခါးကနေ အပြင်ကိုငေးကြည့်လိုက်မိတယ်။ ရုတ်တရက် ကောင်းကင်မှာ လျှပ်စီးအက်ကြောင်းတစ်ခုကို လက်ကနဲ ငါမြင်လိုက်ရတယ်။ ပြီးတော့...........ငါ့ရဲ့ နှလုံးသားတစ်ခုလုံးကို အမှောင်ထုတစ်ခုက ဆွဲခေါ်သွားတာ ခံလိုက်ရတယ်။
မျိုးဇော်(၂၂.၀၆.၀၉)


အထီးကျန် မိုးည


အပြင်မှာ မိုးတွေကတစ်ဖြောက်ဖြောက်နဲ့ ရွာလို့။ ငါကတော့ မှောင်ရိပ်မှည်းမှည်း Lobby ကြီးထဲက မီးရောင်မှိန်မှိန် ကောင်တာအောက်မှာ တစ်ယောက်ထဲထိုင်ရင်း၊ လက်ကနာရီကို ကြည့်လိုက်တော့ သန်းခေါင်ကျော်လို့ (၂)နာရီတောင်ထိုးနေပေါ့။ စံတော်ချိန်ချင်းမတူတဲ့ အွန်လိုင်းပေါ်က friends တွေတောင် off သွားကြပြီ၊ ဘေးနားက ငါ့ရဲ့တစ်ဦးတည်းသော အဖော်ကော်ဖီခွက်ကလည်း အေးလို့၊ ငါနားထောင်နေတဲ့ သီချင်းက ခရီးသွား ငါးယောက်ရဲ့ “မိုးည”၊ အင်း…ငါ့ကိုများ စောင်းဆိုနေကြတာလား…?
မျိုးဇော်(၀၈.၀၆.၀၉)


မိုးရေထဲက အလွမ်း


အိမ်အပြင်မှာ ငသန်မိုးတွေက သည်းသည်းမည်းမည်းရွာနေလေရဲ့။ ပလက်ဖောင်းတွေရဲ့ မိတ်ဆွေ ငါ့ခြေထောက်တွေလည်း ရန်သူတော် အိမ်စောင့်နတ်ကို မျက်နှာချိုသွေးလို့ အထီးကျန်မှု သတို့သမီးကို လက်ဆက်ရင်း၊ အလွမ်းဆိုတဲ့ ကျေးကျွန်တစ်ဦးနဲ့ အိမ်ဆိုတဲ့ အထီးကျန်ထောင်ထဲမှာ လွမ်းစိတ်ကို ဖြေနေရတယ်။
မျိုးဇော်(၂၅.၀၅.၀၉)